Buvayda tumanida O‘zbekiston Respublikasi Mustaqilligining 34 yilligiga bag‘ishlangan bayram tantanalari keng ko‘lamda o‘tkazildi. Bayram tadbiri “Mega Park” istirohat bog‘i amfiteatrida bo‘lib o‘tdi. Tantanani Buvayda tuman hokimi Behzodjon Ibragimov ochib berib, yig‘ilganlarni yurtimiz mustaqilligi bayrami bilan samimiy tabrikladi. O‘z nutqida hokim mustaqillik yillarida mamlakatimizda erishilgan ulkan yutuqlar, yurt tinchligi va xalq farovonligi yo‘lidagi ezgu ishlarga alohida to‘xtaldi. Bayram dasturi “Vatan uchun, xalq uchun, millat uchun!” shiori ostida davom etdi. Tantanada yurtimiz sanʼatining sevimli vakillari — Shohjahon Jo‘rayev, Zulayho Boyhonova, estrada yulduzi Jo‘rabek Qodirov hamda “Buvayda bulbuli” nomi bilan el ardog‘iga tushgan Muhsinbek Mo‘minov o‘z chiqishlari bilan barchaga bayramona kayfiyat ulashdi. Dastur davomida milliy kuy-qo‘shiqlar, rang-barang raqslar, Vatan madhiga bag‘ishlangan taronalar yangradi. Mehmonlar va tuman aholisi uchun yaratilgan shinam muhit, yorqin sahna ko‘rinishlari va jo‘shqin qo‘shiqlar Mustaqillik bayramining qadr-qimmatini yanada oshirdi. Bayram yakunida barchaga tinchlik, farovonlik va yurtimiz ravnaqi yo‘lida ezgu tilaklar bildirildi.